Тошкент вилоятида бир неча фуқароларни алдаб, ишончини суиистеъмол қилиб, моддий манфаатдорлик эвазига ишларини битириб беришини айтиб, фирибгарлик қилган шахслар қўлга олинди. Бу ҳақда Тошкент вилояти ИИБ хабар қилмоқда.

Ангрен шаҳрида жорий йилнинг 21 январдан 14 март кунига қадар бўлган вақт оралиғида Наманган вилоятида яшовчи, вақтинча ишсиз, 1979 йилда туғилган И.М. фирибгарлик йўли билан Бекобод шаҳрида яшовчи нафақаҳўр 1950 йилда туғилган Г.И.ни ишончини суистеъмол қилиб, «Ангрен шаҳридаги хонадонлардан бирини унинг номига  расмийлаштириб бераман», деб алдаб, 2.300 АҚШ долларини олиб, шу кунга қадар қайтариб бермаган.

Шунингдек, 1960 йилда туғилган Қ.Э. фирибгарлик йўли билан 1981 йилда туғилган М.М.ни юқоридаги каби ваъдаларни бериб алдаб, М.М.дан 1.750 АҚШ долларини олиб, ўз эҳтиёжлари учун ишлатиб юборган.

2017 йилнинг май ойида Бўка туманида туриб, ҳозирда Олмалиқ шаҳрида яшовчи уй бекаси 1985 йилда туғилган Ф.Т. фирибгарлик йўли билан, 1972 йилда туғилган Н.А.ни «уй олиб бераман» – деб алдаб, Н.А.дан 22.300.000 сўм пулини олиб, ўз эҳтиёжига ишлатиб юборган.

Ҳозирда уларга нисбатан Ўзбекистон Республикаси Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.