Ахборот технологиялари ва коммуникацияларини ривожлантириш вазирлиги ташаббуси билан Ўзбекистон давлат идораларида хизмат қилаётган 22 нафар мутахассис "Ахборот-коммуникация технологияларини ривожлантириш" мавзусидаги ихтисослашган ўқув-курсида таҳсил олиш учун Жанубий Кореяга жўнаб кетмоқда. Бу ҳақда Ахборот технологиялари ва коммуникацияларини ривожлантириш вазирлиги Ахборот хизмати маълум қилмоқда.

29 июлдан бошлаб, сал кам бир ой давом этадиган ўқувларда ахборот технологиялари билан бирга, молия, солиқ, адлия соҳаларида, шунингдек, «Ергеодезкадастр» давлат қўмитаси тизимида фаолият олиб бораётган мутахассислар иштирок этишади. 

Корея Республикасининг Миллий ахборот жамияти (NIA) ҳамда Корея халқаро кооперация (KOICA) агентликлари кўмагида ташкил қилинаётган ўқувларда Кореянинг етакчи мутахассислари иштирокчиларга жамиятни ахборотлаштириш, "электрон ҳукумат" тизимини шакллантириш ва унинг меъёрий-ҳуқуқий асосини яратиш, ижтимоий ва интерактив хизматларни жорий қилишда АКТ ҳамда янгича инновацион ёндашувларни ишлаб чиқиш, "ақлли шаҳар" платформасини ишлаб чиқиш, электрон суд тизимининг ўзига хосликлари каби мавзуларда маъруза қилишади.

Шунингдек, иштирокчилар Корея Республикаси Ички ишлар вазирлиги, Сеул транспорт бошқаруви ва ахборот тизими муассасасига, BigData марказларига, ахборотлашган махсус ҳудудларга ташриф буюришади.