АҚШ конгрессининг вакиллари палатаси Мексика билан чегарада девор қуриш учун “бошланғич тўлов” сифатида 1,6 млрд долларлик бюджет маблағларини ажратиш учун овоз берди. Бу ҳақда Associated Press хабар қилмоқда.

Таъкидланишича, ташаббусни конгрессменларнинг 230 нафари қўллаб-қувватлаган бўлса, 196 нафари қарши чиққан.

Мексика билан чегарада девор қуриш Дональд Трампнинг сайловолди ваъдаларидан бири эди. Шу билан бирга, АҚШнинг амалдаги президенти Мексикани бунга тўлашга мажбур қилмоқчи эди.

АҚШ конгресси вакиллар палатасининг бюджет масалалари бўйича комиссияси Мексика билан чегарада девор барпо этилишининг бошланишини назарда тутадиган қонун лойиҳасини 12 июль куни эълон қилганди.