Германиялик қассоб Петер Классен бозорга гўштли ичимликлар чиқаради, деб хабар қилмоқда Die Welt.

Маҳсулот Германияда сентябрь ойида сотувга чиқарилади. Классеннинг сўзларига кўра, у Люксембург, Бельгия ва Франциядан бўлган ишлаб чиқарувчилар билан шартнома имзолаб бўлган.

«Биз катта қизиқиш бор эканига гувоҳ бўлмоқдамиз. Бундай маҳсулот ҳали чиқарилмаган», - дея таъкидлаб ўтди қассоб. Унинг қўшимча қилишича, халқаро патент олишга мурожаат ҳам юборган.

Классен ҳозирги пайтда уч таъмдаги ичимликларни чиқаришга тайёрлаб қўйган: «Стейк», «Бомбей мол гўшти» ва «Қирол товуғи». Ичимликни тайёрлаш учун гўшт сабзавотлар билан бирга бульонда қайнатилиб, какао каби кўринишга келгунга қадар эзилади. Шундан сўнг суюқлик идишларга жойланади ва турли микроблардан тозаланади.

55 ёшли қассобнинг сўзларига кўра, шу тариқа совутилган ичимликни бир йил давомида сақлаш мумкин. Унинг фикрича, бу маҳсулот армия ва гуманитар ёрдам миссиялари учун қўл келиши мумкин.