Фаластин президенти Маҳмуд Аббос режали тиббий текширувдан ўтказиш учун шифохонага ётқизилди. Бу ҳақда унинг матбуот котиби хабар берди, деб маълум қилди Associated Press.

Матбуот котибининг сўзларига кўра, Аббос Рамаллоҳдаги шифохонада бир неча соат давомида текширувдан ўтказилади.

Агентликнинг таъкидлашича, Аббосда илгари юрак билан боғлиқ муаммолар кузатилган. Бир йил аввал эса шифокорлар унинг юрагида фавқулодда жарроҳлик амалиётини ўтказишганди.

Кейинчалик маълум бўлишича, Маҳмуд Аббос шифохонани тиббий текширувдан сўнг тарк этган. Бу ҳақда Фаластиннинг WAFA агентлигина мамлакат соғлиқни сақлаш вазири Жавод Авад хабар берган.

"Президент тиббий текширувдан сўнг шифохонани тарк этди. Бундай тиббий текширув ҳар ярим йилда ўтказилади, ҳамда унинг натижалари яхши чиқди – уларнинг кўрсатишича, президентнинг соғлиғи жуда яхши ҳолатда", - дея маълум қилган Авад.

Аввалроқ Маҳмуд Аббос фаластинликларни Ибодат тепалигига қайтишга чақирганди.