Германиянинг Sono Motors стартапи ўзининг илк ишланмасини тақдим этди. Sion деб номланган машина томига қуёш батареялари ўрнатилган. Компания бундай электрокарни 16 минг евродан сотишни режалаштирган. 

Автомобиль томида 330 та фотоэлектр элементига эга қўёш панели ўрнатилган. Улар ёмон об-ҳаво шароитларининг салбий таъсири ва бузилишлардан поликарбонат қоплама билан ҳимояланган. Умуман, қуёш батареялари машинани 30 кмгача қувват билан таъминлай олади. 

У икки турдаги 14,4 ва 30 кВт*соат ҳажмли аккумуляторлар билан тавсия этилади. Sono Sion биринчи тудаги батарея билан 80 кмга яқин масофани ортда қолдирса, иккинчисида 190 кмга етади. 

Тез қувватлаш тизими воситасида батареяларни 40 дақиқада 80 фоизга тўлдириш мумкин. Компанияда таъкидлашларича, яхши ҳаво шароитида аккумуляторларни 8 соатда тўлиқ қуёш панели воситасида қайта қувватлаш мумкин бўлади.

Компания лойиҳани ишга тушириш учун краудфандинг йўли билан 200 минг еврога яқин маблағ тўплади. Ҳозирда Sono Motors машинага буюртмалар қабул қила бошлади. Фирма машинани серияли ишлаб чиқариши учун 5 минг дона электрокарга буюртма қабул қилиши керак. Бу ҳолда буюртмачилар машиналарини 2019 йилда олишади.