Россиянинг собиқ матбуот вазири ва медиаменежер Михаил Лесин Вашингтондаги меҳмонхонада бахтсиз ҳодиса туфайли ҳалок бўлмаган, у ўлдирилган. Бу ҳақда BuzzFeed нашри АҚШнинг разведка ва ҳуқуқни муҳофаза қилиш идораларининг бир неча амалдорларига асосан хабар бермоқда.

Мақолада айтилишича, Лесин АҚШ адлия вазирлиги билан режалаштирилган учрашувдан аввал ўлдирилган. Нашрнинг таъкидлашича, адлия вазирлиги ходимлари Лесиннинг ўлимидан бироз аввал уни ўзи ташкил этган RT телеканалидаги иш ҳақидаги интервьюга чақиришган.

Россия собиқ матбуот вазири ва «Газпром-медиа» собиқ раҳбари 2015 йилнинг ноябрь ойида Вашингтон марказидаги Hotel Dupont меҳмонхонасида ҳаётдан кўз юмганди. Бахтсиз ҳодиса ўлимга сабаб қилиб кўрсатилган, бу борадаги иш ёпилган. Лесин Россия матбуот вазири лавозимини 1999-2004 йиллар давомида эгаллаган.