Сомали давлатида Африка Иттифоқи тинчликпарвар кучлари ҳарбийларининг «Аш-Шабаб» террорчилик гуруҳи жангарилари билан отишмада 24 киши ўлдирилди, деб хабар қилмоқда Reuters агентлиги.

Қуролли тўқнашув 30 июль куни эрталаб амалга оширилган. Бунга жангариларнинг Сомали жанубидаги Қуйи Шабелла минтақасида хизмат вазифасини ўтаётган ҳарбийларга ҳужум қилгани сабаб бўлди.

«Биз отишма бўлган жойда AMISOM (African Union Mission in Somalia)нинг 23 аскари ва Сомалининг бир ҳарбий хизматчисига тегишли жасадни топдик», — деган Қуйи Шабелла губернатори ўринбосари Али Нур.

Африка Иттифоқининг минтақавий тинчликпарвар миссияси 2007 йили бошланган ва ҳозирги вақтгача давом этиб келмоқда. 

Унинг мақсади ҳукумат кучларига террорчилар ва жиноятчиларга қарши курашни ўргатиш ҳамда мамлакатга гуманитар ёрдамларни келтириш учун хавфсиз шароитларни таъминлашдан иборат.