АҚШнинг Лос-Анжелес шаҳри маъмурияти ва Халқаро Олимпия қўмитаси бу шаҳарда 2028 йилги ёзги Олимпиадани ўтказиш бўйича келишувга эришдилар. Бу ҳақда ўз манбасига иқтибос келтирган ҳолда The LA Times нашри хабар бермоқда.

Келишув ҳақида расман кейинроқ эълон қилинади.

Аввалроқ Лос-Анжелес Париж каби 2024 йилги Олимпиадани ўтказишга даъвогарлик қилаётганди. Париж бу курашда фаворит ҳисобланган ва АҚШ шаҳрига 2028 йилги Олимпиада мезбони бўлиш таклиф қилиниши кўзда тутилган. Келишув эса 2024 йилги Олимпиада Парижга тегишини англатади.

Нашрнинг таъкидлашича, яна 4 йил кутишга рози бўлган Лос-Анжелес қандай ён босишларга эришгани ҳозирча ноаниқ. Эҳтимол гап ариза ва болалар спортини ривожлантириш бўйича дастурнинг қўшимча молиялаштирилиши ҳақида кетаётган бўлиши мумкин.

Шу тариқа, ушбу шаҳар Олимпия ўйинларини учинчи марта қабул қилади, аввалроқ улар 1932 ва 1984 йилларда ўтказилган.

АҚШ охирги марта ёзги Олимпиадани 1996 йилда Атлантада қабул қилган. 2002 йилда АҚШнинг Солт-Лейк-Сити шаҳрида қишки Олимпиада ўтган.