Ўзбекистонда ОТМларга кириш бўйича ўртача танлов бир ўринга 11 кишини ташкил этмоқда. Шу билан бирга, олий таълим олишни истовчилар сони ҳар йили 10-15 фоизга ошиб бормоқда. Хусусан, 1 август куни бўлиб ўтган тест синовларида иштирок этиш учун 730 мингга яқин абитуриент ҳужжат топширган. Бу рақам 2016 йилда 660 мингни ташкил этган. Ўзбекистон Олий ва ўрта-махсус таълим вазири Иномжон Мажидов Халқаро Пресс-клубда бўлиб ўтган сессияда шу ҳақда маълум қилди.  

Аммо, шунга қарамай, Ўзбекистонда кўп йиллар мобайнида олий ўқув юртларига қабул қилиш квоталари ўзгармай келаётган эди. Жорий йили бу борада ҳам ўзгаришга қўл урилди ҳамда ОТМга талабаларни қабул қилиш квоталари республика бўйича 10 фоизга оширилди.

Мажидовга кўра, қабул қилинадиган талабаларни бирданига 10 фоизга ошириш ҳам катта кўрсаткичдир. Чунки, бунинг учун олий таълим муассасаларида жиддий тайёргарлик кўриш талаб этилади. Қолаверса, моддий база, педагог ўқитувчилар, ўқув лабораториялар керак бўлади. 

Вазирнинг эътироф этишича, ўзбек ёшларида олий таълимни олишга қизиқиш жуда ҳам юқори. Шу боисдан ҳам абитуриентлар ва талабаликка қабул қилинувчилар ўртасидаги муносиб рақобатни таъминлаш соҳасида кўп ишлар қилиниши керак.