ЖАР полициячилари Mercedes-Benz C220 автомобили 4 эшак орқали Зимбабвега олиб ўтилиши олдини олишди. Бу ҳақда TimesLIVE портали хабар тарқатди.

Ҳуқуқ тартибот органлари жиноятчилар машинани икки давлат ўртасидаги чегара бўйлаб ўтган Лимпопо дарёсининг қуриб қолган қисмидан эшаклар ёрдамида олиб ўтмоқчи бўлганида қўлга олишган.

«Эшаклар автомобилни дарё ўзанидан судрашган. Эшаклар чарчаб қолгач, ходимларимиз уларга етиб олишган», — деган маҳаллий полиция вакили.

Жиноятчилар эшаклар ва машинани қолдириб Зимбабве ҳудудига қочиб кетишган. Ҳозирча ҳеч ким ҳибсга олинмаган.

Бу ҳодиса 31 июль куни рўй берган, жониворлар бу ҳодиса вақтида жабрланмаган.

2 август куни Зимбабедаги The Herald нашрида ёзилишича, Жанубий Африка Республикасида чегарадаги ноқонуний миграция ва контрабандага қарши кураш олиб борилмоқда. Кейинги ҳафтада полициячилар чегара орқали машина олиб ўтилишига бўлган 5та ҳаракатни тўхтатишган.

Ўтган йилнинг декабрида ҳам полиция контрабандачилар Лимпопо ўзанида эшаклар орқали машина олиб ўтилишига ҳаракат олдини олишганди.

The Herald нашрида қайд этилишича, ЖАРда ўғирланган машиналарнинг аксари Малави ва Танзанияда пайдо бўлади.