Жорий йилнинг 4 август куни Ўзбекистон Республикаси Адвокатлар палатаси ва Тошкент давлат юридик университет томонидан ҳамкорлик тўғрисидаги меморандум имзоланди.

Ушбу меморандумни асосий мақсадларидан бири - юридик кадрларни тайёрлаш соҳасидаги ҳамкорликни мустаҳкамлаш, назария ва амалиётнинг узвий боғлиқлигини таъминлаш ҳамда талабаларни амалиёт ўташи учун керакли билим ва кўникмаларини шакиллантириш, уларни келажакда мукаммал мутахассис бўлиб етишишлари учун пойдевор яратишдир.

Ҳамкорлик меморандумини имзолашга бағишланган тадбирда Ўзбекистон Республикаси адвокатлар палатаси раиси Р.Аҳмедов ва адвокатлик тузилмалари адвокатлари, Ўзбекистон Республикаси Адлия вазири ўринбосари - Тошкент давлат юридик университет ректори Е.Каньязов, ТДЮУнинг проректорлари, кафедра мудирлари, профессор-ўқитувчилари ҳамда фаол талабалари иштирок этдилар.

Тадбир давомида Адвокатлар палатаси ва ТДЮУнинг ҳамкорлигини янги босқичга кўтарилгани ва ушбу босқич замонавий юридик кадрларни тайёрлашда муҳим омил бўлиб хизмат қилиши таъкидланди.

Жадал амалга оширилаётган ислоҳотлар, суд-ҳуқуқ соҳасига қўйилаётган муҳим талаблар бўлажак юридик кадрлардан нафақат назарий билимларни билиш, балки бу билимларни амалиёт билан бевосита боғлаши, уларни қўллаши каби муҳим масалаларни қўймоқда. 

Имзоланган меморандум ҳам айнан шу муҳим масалаларни инобатга олган ҳолда ТДЮУ талабаларини адвокатура тизимларида самарали амалиёт ўташи; ишларни судда кўрилишида бевосита қатнашиши; хўжалик субъектларини фаолиятига кўмак бериш; тегишли ҳужжатлар лойиҳаларини тайёрлашда; музокаралар олиб бориши ва бошқа тадбирларда қатнашишини белгилаб қўйган.  

Меморандум нормаларига асосан ҳамкорликда семинарлар, конференциялар, давра суҳбатлари ва уста-дарслар ўтказилиши режалаштирилган. 

ТДЮУ талабаларини қонунларни билиши, уларга шарҳ бериши, муаммоли вазиятларни ҳал этиши ва процессуал ҳужжатларни тузиш кўникмаларини шакллантиришга қаратилган Адвокатлар палатаси томонидан турли танловлар ўтказилиши ҳам кўзда тутилган.