Қирғизистон президенти лавозимига номзодлардан бири, "Шматрица" маҳаллий компанияси директори Руслан Джунусов сайловолди пойгасидан чиқиб кетди, чунки давлат тили – қирғиз тили бўйича тестдан ўта олмади. Бу ҳақда  ТАСС ахборот агентлигига Қирғизистоннинг давлат тили бўйича миллий комиссияси маълум қилди. 

"Қонунга кўра, президентликка барча номзодлар қирғиз тилини яхши билишлари керак. Давлат хизматчилари билимлари даражасини аниқлаш учун "Қирғизтест" деб номланган махсус тизим яратилган бўлиб, унинг ёрдамида тилни билиш даражаси аниқланади", деб тушунтирилди комиссияда. Тестдан муваффақиятли ўтиш учун номзодлар 100 баллдан 60 балл тўплаб, ўртадан юқори даражани кўрсатишлари керак. "Жунусов 46,1 баллик натижани кўрсатди", дейилган хабарда.

Айни вақтда ўз номзодини қўйишини эълон қилган 59 кишидан 20 га яқини давлат тилидан имтиҳондан ўта олган. Ҳозирча бу борада энг катта натижани мамлакатда таниқли сиёсатчи, журналист Адахан Мадумаров кўрсатган, унинг олган бали 96,8 ни ташкил қилган. 2-ўринда мамлакатнинг амалдаги бош вазири Сооронбай Жээнбеков кетмоқда, у тестдан 94,6 балл олган.

Аввалроқ 59 киши ўз номзодини сайловларга қўйиш ҳақида сайлов комиссиясини огоҳлантирган бўлиб, бугунга келиб уларнинг сони 4 нафарга камайди: икки киши сайловолди кампаниясида иштирок этишдан бош тортган, бир киши эса 35 ёшга тўлмагани аниқланган, яна бир киши давлат тилига имтиҳондан ўта олмаган.

Қирғизистон президенти сайловлари 15 октябрга белгиланган. Сайловда иштирок этишга рўйхатдан ўтганлик гувоҳномасини олиш учун қирғиз тилига тест топширишдан ташқари, номзодлар ўз номига 30 минг фуқаронинг имзосини тўплашлари керак ва 1 млн сом миқдорида сайлов гаров пули киритишлари керак.