Япониянинг йирик концернлари Toyota ва Mazda электродвигателли автомобилларни ишлаб чиқиш ҳамда АҚШ ҳудудида қўшма корхона ташкил этиш мақсадида шериклик қилиш ниятида. Бу ҳақда Nikkei газетаси хабар берди.

Унинг маълумотларига кўра, икки компания вакиллари, Toyota Mazda’нинг 5 фоиз акцияларини харид қилиши, Mazda эса шерикчиликни йўлга қўйиш учун маблағ йўналтириш борасида музокаралар олиб бормоқда. Ҳар икки корпорация бунинг ҳисобидан 2019-2020 йилларда электромобиллар жаҳон бозорига чиқишга ҳаракат қилади.

Toyota ва Mazda маҳсулотини асосан АҚШда сотиш мўлжалланмоқда. Концернлар харажатларни камайтириш ва илғор технологияларни ривожлантиришга кўпроқ маблағ йўнатилриш учун у ерда йилига 300 минг автомобилни чиқариш қувватига эга заводни биргаликда қуради, асосан бу йўлтанламаслар бўлади. Ҳозирда Toyota АҚШда олтита корхонага эга бўлса, Mazda’да битта ҳам йўқ, шунинг учун маҳсулот Япония ҳамда Мексика орқали етказиб берилмоқда.

2015 йилда ҳар икки автомобиль ишлаб чиқарувчиси хавфсиз ҳайдаш технологияси ва атроф-муҳитга минимал зарар келтирувчи машиналарни ишлаб чиқиш бўйича ҳамкорлик кенгайганини маълум қилди. Бироқ ўшанда бунга биргаликда маблағ сарфлаш ҳақида ҳеч нарса айтилмаган.

Нашрнинг таъкидлашича, Toyota ва Mazda ҳамкорлигининг кенгайиши жаҳон автомобиллар бозорини йирик концернлар маҳсулоти ҳисобидан ташкил этиш бўйича ҳаракатлар мустаҳкамланаётгани туфайли рўй берган.