Жуфтликда "Катта дубулға" сериясига кирувчи барча мусобақаларни юта олган италиялик аёл теннисчи Роберта Винчи номаълум кимсалар унинг уйидан у фаолиятида қўлга киритган барча унвонларни ўғирлаб кетишганини маълум қилди. 

"Бир неча кун аввал менинг Тарантодаги уйим тунаб кетилган. Ўғрилар нафақат турли қимматбаҳо нарсаларни, балки мен учун қадрли бўлган – мен қўлга киритган унвонларни ҳам ўғирлаб кетишган. Бу унвонлар шунчаки рамзлар бўлса ҳам, улар менга ҳар куни нима учун машқ қилаётганимни, кортга чиқаётганимни эслатиб турардилар.

Бу номардларча ва аҳмоқона ишдир. Мен хотираларим, кўз ёшларим, пешона терларим, толиқишларим, табассумларим, ишимга содиқлигим ва мен борган қурбонлар мужассамланган бу унвонларимга энди ким эгалик қилаётганини билишни истардим", деб ёзган теннисчи Instagram’да.

34 ёшли Винчи якка тартибда WTA’нинг 10 та унвонини ва жуфтликда 25 та унвонини қўлга киритган. Спортчи ҳозирда дунё рейтингининг 37-поғонасини эгалламоқда.