Саудия Арабистони ҳукумати ҳожиларнинг хавфсизлигини таъминлаш мақсадида 30 минг тиббий хизматчиларни жалб этишни режалаштирган. Мусумонлардан имкон топганлари йилда бир марта Ислом динининг муқаддас қадамжолари – Маккаи Мукаррама ва Мадинаи Мунаввара шаҳарларини зиёрат қилишга келишади. Бу ҳақда Саудия подшоҳлигининг соғлиқни сақлаш вазирлиги маълум қилди, деб хабар қилмоқда ТАСС.

Бу йилги ҳаж мавсумининг бошланиши тахминан 30 августларда бошланади ва 1-2 сентябрларда Қурбон ҳайити билан тугайди. Шу муддатда 30 минг тиббий ходим сафарбар этилади. Улар исталган вақтда ёрдамга муҳтож ҳожига ёрдам беришга шай туришади. 

Бундан ташқари вазирлик менингит ва гриппга қарши эмлаш дастурини ҳам ишга туширган. Зиёратчилар Жидда халқаро аэропортига келганларидан сўнг, ЖССТ меъёрлари бўйича тиббий кўрикдан ўтишлари керак бўлади. Шу билан бирга, Саудия Арабистони элчихонасига виза учун ҳужжат топширганда мажбурий тартибда менингитдан эмлангани ҳақидаги маълумотномани тақдим этиши шарт. 

Ҳаж вақтида Макка ва Мадина шаҳарлари, Арофат тоғи атрофи ва Мино водийсига яқин 25 та шифохона фавқулодда тартибда фаолият юрита бошлайди. У ерда августнинг охирги кунлари ва сентябрь ойи бошларида миллионлаб зиёратчилар тўпланишади. Вазирлик, шунингдек, 150 дан ортиқ кўчма госпиталларни ташкил этади. Беморларни зудлик билан бошқа жойга кўчириш учун 100 та тиббий ёрдам машинаси навбатчилик қилади. 

Ҳаж Ислом динининг бешта устунидан биридир. У Зулҳижжа ойининг 8-куни бошланиб, 5 кун давом этади.