5 августда Теҳронда Эрон Ислом Республикасининг 7-президенти, иккинчи муддатга сайланган Ҳасан Руҳонийнинг лавозимига киришиши тантанали маросими бўлиб ўтади. Руҳоний мамлакат парламенти биносида қасамёд келтиради ва шу тариқа икки кунлик инаугурация жараёнини якунлайди.

Эрон раҳбари ва диний етакчиси оятуллоҳ Али Ҳаманеий Руҳонийни бу лавозимга 4 август куни тасдиқлади. Шу ондан бошлаб унинг 4 йиллик президентлик муддатининг ҳисоб боши бошланди. 

Мамлакат конституциясига кўра, Руҳоний президент қасамёди матнини ўқийди ва уни имзолайди, сўнгра қисқача нутқ сўзлайди. Шундан кейин у маросимга таклиф қилинган хорижий делегация раҳбарлари билан учрашади.

Руҳонийни шахсан табриклагани 100 дан кўпроқ давлатдан фахрий меҳмонлар келадилар, бу Эрон тарихидаги рекорд натижадир. Теҳронда таъкидланишича, Руҳонийнинг инаугурациясига катта қизиқиш АҚШнинг янги санкциялари ортида бутун дунёга билдириладиган "муҳим нома" ҳисобланади.

Теҳронга Буюк Британия, Германия, Франция, Хитой, Россия делегациялари, ЕИнинг ташқи ишлар ва хавфсизлик сиёсати олий вакили Федерика Могерини келиши кутилмоқда. 

Руҳоний ўз маъмуриятининг яқин 4 йилга асосий вазифалари сифатида ички муаммолар: ночорлик, ишсизлик, коррупция, инфляция билан курашишни айтган. У шунингдек аҳоли барча қатламларининг ҳуқуқларини амалга ошириш учун барча ишни қилишга ваъда берган. 68 ёшли сиёсатчи бу ҳақда Теҳрондаги Имом Ҳомейний масжидида президент лавозимига тасдиқланиши маросимида айтиб ўтган.