АҚШ президенти Дональд Трамп ва Франция етакчиси Эммануэль Макрон ўзаро телефон мулоқоти ўтказди. Бу ҳақда Оқ уй матбуот хизмати хабар бермоқда.

«Президент Дональд Трамп бугун президент Эммануэль Макрон билан мулоқот ўтказди. Бунда Сурия ва Ироқдаги давом этаётган инқирозга нисбатан мамлакатлар ҳамкорлигини яхшилаш ва Эроннинг салбий таъсирига қарши туриш муҳокама қилинди», - дейилади хабарда.

Давлат раҳбарлари Ливиядаги сиёсий вазият, шунингдек, Венесуэла ҳамда Украинадаги ҳолат бўйича ҳам фикр алмашишган.

«Улар президент Николас Мадуронинг Венесуэладаги режими мамлакат аҳолиси ҳуқуқларини тиклаши кераклигини қайд этишди, ҳамда Украинада вазиятни ҳал қилишда томонлар Минск келишувларига риоя этишлари лозимлиги муҳимлигини таъкидлашди», - дея қайд этилади Оқ уй хабарида.

Бундан ташқари, Трамп ва Макрон Шимолий Кореяга тегишли бўлган «ўзаро манфаатлар»ни ҳам муҳокама қилган.