5 август куни Сирдарё вилояти маркази Гулистон шаҳридаги бозор ҳудудида ёнғин рўй берди. Ижтимоий тармоқда ҳодиса жойида олинган суратлар тарқалди.

«Кун» сайти ҳодиса тафсилотларини аниқлаш учун 6 август давомида ҳаракат қилди (Дам олиш куни бўлгани туфайли ФВВ сайтида ҳам, ИИВ сайтида ҳам бу борада хабар берилмаган). Куннинг иккинчи ярмига келиб ИИВ ёнғин хавфсизлиги бош бошқармаси матбуот хизмати «Кун» саволларига «истар-истамас» жавоб қайтариб, ёнғин ҳақида расмий маълумот берди.

«5 август куни Сирдарё вилояти, Гулистон шаҳрида соат 18:27да Бунёдкор кўчасида жойлашган савдо мажмуасидаги дўконларда ёнғин бошланди. Кўрилган чоралар натижасида ёнғин соат 20:25да тўлиқ ўчирилди.

Ёнғин савдо мажмуаси ҳудудида 400 кв метрдан ошиқ майдондаги дўконларга шикаст етказган. Ўт ўчирувчиларнинг саъй-ҳаракатлари натижасида тадбиркорларнинг маълум қисмининг моддий бойликлари эвакуация қилиниб, сақлаб қолинди», дея маълумот берган «Кун» суҳбатдоши.

Ёнғин оқибатида ҳалок бўлганлар ва тан жароҳати олганлар йўқ.

Ҳозирда ҳодиса тафсилотлари бўйича суриштирув ишлари олиб борилмоқда. Ёнғин талофатлари аниқ келтирилмаган.

Дастлабки тахминларга кўра, ёнғин қисқа туташув натижасида келиб чиққан.

Бу ёнғин ҳақидаги хабар ёнғин рўй беришидан роса 24 соат ўтиб берилмоқда. Сайт ҳодиса ҳақида аниқ маълумот бериш учун расмий манбалар билан боғланишга ҳаракат қилди. Ҳолбуки бу вақтда миш-миш кўринишида ёнғин вақтида одамлар ҳалок бўлгани ҳақида хабарлар тарқалаётганди.

Ички ишлар вазирлиги Ёнғин хавфсизлиги Бош бошқармасида раҳбарият рухсатисиз маълумот берилмаслиги, ёнғин тўғрисидаги расмий маълумот душанба куни эълон қилинишини билдиришди.

Расмий маълумот сўралган манбалардан бири эса «бу хабарни бериш шартми?» қабилида фикрлаб, «одамлар кайфиятини бузадиган хабар бермаслик, унинг ўрнига ҳукумат томонидан олиб борилаётган ишлар ҳақида яхши бўлиши» ҳақидаги фикрларини билдириб ўтди.

Ахборот олишдаги бу навбатдаги қийинчилик баъзи давлат идораларида ҳамон «эскича» ишлашда давом этилаётганини кўрсатмоқда.