Ўзбекистон Республикаси Мустақиллигининг 26 йиллигини нишонлашга тайёргарлик кўриш ва уни ўтказиш даврида жамоат тартибини сақлаш, фуқаролар хавфсизлигини таъминлаш, ҳуқуқбузарликлар ҳамда фавқулодда ҳолатларни олдини олиш мақсадида Тошкент шаҳар ИИББ 30 июлдан бошлаб «Тозалаш-аксилтеррор» операциясини ўтказиб келмоқда

ИИББ матбуот хизмати хабарига кўра, «Паспорт-виза» тадбири доирасида пойтахтда кўп қаватли уйлардаги 96864 хонадон ва хусусий секторнинг 34380 уйлари, шунингдек, 5452 муассаса ва ташкилот текширилган. 4479 нафар шахсга нисбатан маъмурий баённомалар тузилган, шулардан 4265 нафари — рўйхатдан ўтмай яшаётганлар, 146 нафари — пропискасиз яшаш учун тақдим этилган уй-жой эгалари, 68 нафари — пропискасиз шахсларга иш берган шахслардир.

Мавзе ва маҳаллаларда фуқаролар хавфсизлигини таъминлаш ва жамоат тартибини сақлаш борасида жамоат вакиллари билан биргаликда олиб борилган тарғибот-ташвиқот ишлари натижасида кўп қаватли уйларга қўшимча 86та видеокузатув камералари ўрнатилди. 

«Тозалаш-аксилтеррор» тадбири даврида жами 56 нафар шахс тиббий муассасаларга жойлаштирилган бўлиб, улардан 21 нафари спиртли ичимликка ружу қўйган шахслар, 14 нафари гиёҳвандлар ва 21 нафарини тажовузкор руҳий касалларни ташкил этди.​