Венесуэлада бир гуруҳ ҳарбийлар мамлакат президенти  Николас Мадурога қарши исён кўтаришганини эълон қилишди. Бу ҳақда ҳарбийларнинг ижтимоий тармоқларда пайдо бўлган видеомурожаатига иқтибос келтирган ҳолда El Nacional нашри хабар бермоқда

Маълум қилинишича, гуруҳга ўзини капитан Хуан Кагварипано деб атовчи одам бошчилик қилмоқда. Унинг таъкидлашича, "улар Мадуронинг қирғин келтирувчи золимлигига қарши қонуний исён кўтаришларини эълон қилишган". 

"Таъкидлаймиз, бу тўнтарув эмас. Бу конституцион тартибни тиклашга қаратилган фуқаролик ва ҳарбий ҳаракатлардир. Янада кўпроғи – мамлакатни буткул йўқ бўлишдан қутқариш, ёшларимиз ва оилаларимиз ўлдирилишини тўхтатишга қаратилган ҳаракатлардир", деб айтган исёнчилар бошлиғи.

Таъкидланишича, Кагварипано "диссидентлик ҳаракатини қўллаб-қувватлагани" учун 2014 йилдан бери қидирувда қолмоқда.

Associated Press ахборот агентлигининг Венесуэланинг ҳукмрон партияси вакили Диосдадо Кабельога иқтибос келтирган ҳолда хабар беришича, ҳукуматга мойиллик билдирувчи қўшинлар томондан назорат қилинувчи ҳарбий базага террорчилик ҳужуми амалга оширилган. Бир неча киши қўлга олинган.

Кабельонинг айтишича, ҳарбийлар базадаги вазият устидан назоратни тезда қўлга олганлар.