САВОЛ: Айрим фанлардан педагог ходимлар етишмаган тақдирда мактаб раҳбари ёки таълимни бошқарув органлари раҳбарлари кўрсатмаси, буйруғи, рухсати, турли Кенгашларнинг қарорлари билан тегишли фан ёки бошланғич синф дарслари мутахассислиги мос келмайдиган олий маълумотли (педагог ёки нопедагог) ходимга берилиши мумкинми?

Элёр МУХТОРОВ, Жиззах вилояти.

ЖАВОБ: Халқ таълими вазирининг 2015 йил 24 июндаги 191-сонли буйруғи билан тасдиқланган Халқ таълими ходимлари асосий лавозимларининг малака тавсифларининг 36-бандига кўра, умумий ўрта таълим муассасасининг ўқитувчиси ўзи ўқитадиган ўқув фанининг илмий-назарий асослари, унинг мазмуни ва амалда қўлланилиши, ўқитаётган фан бўйича дарс ўтиш методикаси ва ташкил қилиш тартибини билиши лозим. Малака тавсифларининг 37-бандида умумий ўрта таълим муассасаси ўқитувчисига қўйиладиган малака талаблари белгиланган бўлиб, унга мувофиқ фан ўқитувчиси фан йўналишига тўғри келувчи камида бакалавр даражасидаги олий педагогик маълумотга ёки камида бакалавр даражасидаги олий маълумот ва унга қўшимча тарзда фан йўналишига тўғри келувчи қайта тайёрлов курси маълумотига эга бўлиши керак.

Демак, муайян фан ёки бошланғич синф дарслари мутахассислиги мос келмайдиган олий маълумотли (педагог ёки нопедагог) ходимга берилиши мумкин эмас. Чунки умумий ўрта таълим муассасаларида ўз мутахассислигига мос бўлмаган дарс машғулотларини олиб бораётган педагог ходим номутахассис ҳисобланади.

Саволга ЎзбекистонРеспубликаси Халқ таълими вазирлиги бош юрисконсульти С.Миразимов жавоб берди.

Эслатма: «Юридик хизмат минбари»да саволларга берилаётган жавоблар тавсиявий характерга эга.