Америка Қўшма Штатлари Россиядаги дипломатлари сони қисқартирилганига 1 сентябрда жавоб беради. Бу ҳақда АҚШ давлат котиби Рекс Тиллерсон баёнот берди деб ёзмоқда Reuters.

Унинг сўзларига кўра, Тиллерсон ушбу муддат хусусида Россия ТИВ раҳбари Сергей Лавровни 6 август куни Филиппинда учрашган чоғида хабардор қилган. 

Аммо Тиллерсон АҚШ дипмиссия қисқаришига қандай жавоб бериш борасида бир тўхтамга келмаганини таъкидлади. У Лавровга ушбу чораларга аниқлик киритувчи айрим саволларни берган. 

Июль ойи охирида Россия президенти Владимир Путин, АҚШга нисбатан янги чоралар доирасида 755 америкалик дипломат Россияни тарк этишига тўғри келишини айтган эди.

Шу билан бирга, Тиллерсон АҚШ турли қарашлар сабабли алоқаларни узишдан маъни йўқ, деб ҳисоблашини ва Россия билан ишлашни хоҳлаётганини айтган. 

У Россия ТИВ раҳбари Сергей Лавров билан учрашуви хусусида сўз юритар экан, Россия мулоқотга ва Украинадаги инқирозга барҳам бериш йўлларини қидиришга «қайсидир маънода тайёрлигини» билдирмоқда. 

Давлат котибининг сўзларига кўра, у Лавровга, Россиянинг АҚШдаги сайловларга «аралашуви» — жиддий муаммо эканини айтган.