«Тур де Франс» кўп кунлик велопойгасининг икки карра ғолиби испаниялик Альберто Контадор «Вуэльта» гранд-туридаги иштирокидан сўнг профессионал велопойгачи сифатидаги фаолиятини якунлаши ҳақида маълум қилди.

«Икки нарса ҳақида хабар бермоқчиман. Биринчидан, кейинги ҳафтадан «Вуэльта»да қатнашаман, иккинчидан эса, бу менинг профессионал велопойгачи сифатидаги сўнгги пойгам бўлади. Бу ҳақда ҳеч қандай қайғусиз гапирмоқдаман, бу ўйлаб қабул қилинган қарор. Ўз ватанингдаги пойгада қатнашиб хайрлашиш жуда яхши, шунинг учун унинг бошланишини интиқлик билан кутаяпман», - дея хабар берди спортчи Instagram’даги саҳифасида.

Контадор «Тур де Франс» ва «Жиро д'Италия»нинг икки карра, «Вуэльта Испания» пойгасининг эса уч карра ғолиби саналади.

Эслатиб ўтамиз, «Вуэльта Испания» 19 август-10 сентябрь кунлари бўлиб ўтади.