Германиянинг Кёльн шаҳрида истиқомат қилувчи Соне Куйас исмли аёлнинг чап қўли ва ҳар икки оёғи чивин чақиши туфайли кесиб ташланди, деб хабар бермоқда Kolner Express.

Куйаснинг айтишича, ҳашаротнинг чақишидан сўнг ўзини ёмон ҳис эта бошлаган.

«Мен дарров шиш пайдо бўлганини сездим. Шундан сўнг қалтироқ бошланди, бошим айланди ва танам зирқираб оғришни бошлади. Менинг ҳамкасбим «тез ёрдам» чақирди», - дея айтиб ўтди аёл.

Таҳлиллардан сўнг аёлга уйга кетишга жавоб беришди, бироқ унинг аҳволи ёмонлашишда давом этган. Турмуш ўртоғи уни шифохонага, интенсив терапия бўлимига олиб келди. У ерда Куйас комага тушган ва бир ҳафтадан сўнг ўзига келган. Бу вақтда эса унинг чап қўли ва ҳар икки оёғи қорайиб кетганди. Улар кесиб ташланди. Нашрнинг таъкидлашича, чивин, афтидан, стрептококк қўзғатадиган инфекцияни олиб юрган, ҳамда чақишдан сўнг аёлнинг қони заҳарланган.

Аввалроқ чивин парвози секинлаштириб намойиш қилинганди.