Бухоро вилояти Ички ишлар бошқармаси ва унинг жойлардаги қуйи тизим ходимлари томонидан байрамолди арафасида ўтказилаётган «Тозалаш-Антитеррор» тадбирлари ўзининг самарасини бераётганлиги билан бир қаторда, аҳоли ҳушёрлигини оширишга хизмат қилмоқда. Тадбирларни янада самарали ташкил этиш мақсадида бошқарма бошлиғининг алоҳида фармойиши асосида, ички ишлар идораларининг хизмат соҳалари ходимларидан иборат бўлган гуруҳлар бир ой давомида вилоятнинг барча шаҳар ва туманларида мақсадли тадбирларни ўтказиб келадилар.

Тезкор-профилактик тадбирлар вилоятнинг чекка ва олис туманларидан бўлган Олот ва Қоракўл туманларида бошлаб юборилиб жами 300 нафардан зиёд ички ишлар идоралари ходимлари, 200 нафар жамоатчилик вакиллари ва бошқа ҳамкор мутасадди идоралар ходимлари иштирок этишди. Тадбирга жалб қилинган ходимлар фаромойиш талабларига асосан алоҳида гуруҳларга бўлиниб, ҳар бир гуруҳга туман ҳудудида бажариши лозим бўлган вазифалар белгилаб берилди.

Жумладан, туман ҳудудида хизмат олиб бораётган ҳар бир профилактика инспекторларига маъмурий ҳудудида ҳуқуқбузарликлар профилактикасини амалга ошириш, мавжуд хонадонларда истиқомат қиладиган аҳоли ўртасида паспорт-виза қоидаларига риоя қилиниши ҳолатини ўрганиш, профилактик ҳисобда турган, жиноят ва ҳуқуқбузарликлар содир этишга мойил, сурункали ичувчи, оилавий жанжалкаш, ахлоқ одоб қоидаларига риоя этмайдиган енгил табиатли аёллар, шунингдек, фарзанд тарбиясига салбий таъсир кўрсатувчи шахслар билан профилактик ишларни олиб боришлари учун, ички ишлар бошқармаси хизмат соҳаларидан ходимлар ажратилиб, жамоатчилик вакиллари билан ҳамкорликда ҳар бир фуқаро билан профилактик суҳбатлар олиб борилди.

Йўл ҳаракати хавфсизлигини таъминлаш гуруҳлари томонидан 60 нафар қоидабузар ҳайдовчилар аниқланиб, уларга нисбатан Ўзбекистон Республикаси Маъмурий Жавобгарлик тўғрисидаги Кодекснинг турли моддалари билан маъмурий баённомалар расмийлаштирилди. Қўпол коидабузарлик содир этган, йўл-патрул хизмати ходимларининг қонуний талабларига бўйсунмаган, ҳайдовчилар алоҳида профилактик ишлар амалга оширилиб, 34 та автомашиналар жарима майдонига киритилди, бундан ташқари, туман Давлат солиқ идораси ходимлари билан ҳамкорликда олиб борилган тадбирлар давомида 3 нафар ноқонуний йўловчи ташиш билан шуғулланувчи ҳайдовчи “Киракаш”лар аниқланиб, уларга нисбатан маъмурий баённомалар расмийлаштирилди.

Тадбирлар давомида Олот ва Қоракўл туманидаги 1753 та хонадонлар текширилиб, уларда истиқомат қилувчи 5906 нафар фуқаролар билан суҳбатлар олиб борилди. Ушбу жараёнда 52 нафар фуқаролиги бўлмаган шахслар, 4 нафар чет эл фуқаролари, 196 нафар ов қуролига эга бўлган шахслар, 129 нафар муқаддам судланган, 69 нафар озодликдан маҳрум этиш билан боғлиқ бўлмаган жазоларни ижро этишга ҳукм қилинган ҳамда 203 нафар бошқа тоифада профилатик ҳисобда турувчи шахслар текширувдан ўтказилиб, улар билан якка тартибда профилактик ишлар олиб борилди, шунингдек, вақтинчалик рўйхатда турмасдан ишлаб ва яшаб келаётган 38 нафар бошқа вилоят фуқароларига нисбатан маъмурий баённомалар расмийлаштирилди.

Бундан ташқари, олиб борилган тадбирлар давомида нефть маҳсулотларининг ноқонуний савдоси билан шуғулланадиган фуқаролар аниқланиб, улардан 180 литр миқдоридаги нефть махсулотлари тегишли тартибда ҳужжатлаштириб олинди.