Қозоғистон Республикаси бош вазири Бакитжан Сағинтаев мамлакат Қишлоқ хўжалиги вазири ўринбосари Қарат Айтуганов фаолиятини кескин танқид қилиб чиқди. Маҳаллий нашрлардан бирида ёзилишича, бош вазир масъул мулозимдан «нега Самарали бандлик дастури амалда сусткашлик амалга оширилаётгани»га доир савол билан юзланган. Вазир ўринбосарининг айтишича, дастур бешта вилоятда 60 фоиздан юқори натижада амалга оширилган.

Сағинтаев савол берган пайт вазир ўринбосари Қайрат Айтуганов ўз нутқини якунлаб жойини эгаллаш учун қадам ташламоқчи бўлиб турганида бош вазирдан танбеҳ эшитган.

«Энди эса ортингизни ўгириб, хона бўйлаб сайр қилиб юрибсиз! Ҳеч бўлмаса, ўтириб жавоб беринг!», - дея талаб қилган бош вазир.

«Дастур учун ажратилган пулларни май ойида қабул қилдик», - дея жавоб берган вазир ўринбосарига Бакитжон Сағинтаев кескин саволлар билан юзланган: «Мен сиздан пулни қачон қабул қилиб олдингиз, деб сўрамадим. Жамбил вилоятида 47 фоиздан бошлаб, Манғиставда 0 фоиз билан якунланмоқда. Сабаби нимада? Тушундингизми?».

Маълум бўлишича, Манғистав области ҳудудида тадбиркорларни аграр-кредитлаш муассаса филиали мавжуд эмас. Бу ҳудудда яшовчи барча муҳтож бўлганда Атирауга боришга мажбур бўлмоқда.

«Демак, сиз қабул қилган жойлардаги раҳбар ўз ишини тўлиқ бажара олмаяпти. Кўчада дуч келган кадрни давлат ишига ёллаш яхшиликка олиб келмайди», - деб фикр билдирди Бош вазир.