АҚШ мудофаа вазирлиги ИШИДнинг Филиппинда ҳаракат қилувчи жангариларига қарши ҳарбий операция режасини ишлаб чиқмоқда.

NBC телеканалининг Пентагон вакилларига иқтибос келтирган ҳолда хабар қилишича, 8 августдаёқ Филиппинда жангарилар позицияларига зарба бериш режаси эълон қилиниши мумкин. Тахмин қилинишича, операция давомида дронлар қўллаш кўзда тутилган. 

АҚШнинг Филиппин армиясининг аксилтеррорчилик операциясига аралашуви ИШИД АҚШнинг Осиё-Тинч океани минтақасидаги иттифоқдошларига билдираётган хавфи билан тушунтирилади. Вашингтонда террорчиларга қарши кураш масаласида филиппинлик ҳамкасблари билан фаол ҳамкорлик қилинаётгани айтилган.

7 августда Манилага АСЕАН давлатлари вакиллари билан учрашувга келган АҚШ давлат котиби Рекс Тиллерсон Вашингтон Филиппин ҳукумати билан разведка маълумотларини фаол бўлишаётганини ва уларга ҳаво разведкаси учун бир нечта енгил самолёт тақдим қилганини айтган.

Тиллерсон таъкидлаганидек, у Филиппин ҳукумати томондан инсон ҳуқуқлари бузилиши ҳолатларига қарамасдан, АҚШнинг Манилага ёрдам бераётганида ҳеч қандай зиддият кўрмаяпти.

Amnesty International ва Human Rights Watch ҳуқуқни ҳимоя қилиш ташкилотлари Филиппиннинг амалдаги президенти Родриго Дутертени Давао мэри бўлган вақтда кўплаб судсиз қатллар ижро этилишига қаршилик кўрсатмаганликда айблаб келадилар. Дутертенинг ўзи бу воқеаларга алоқадорлигини инкор этади, бироқ жиноятчиларнинг ўлдирилишида "ҳеч қандай ёмон иш кўрмаслигини" айтади.

ИШИД жангарилари мамлакатнинг Минданао вилоятида ҳаракат қиладилар.