Ўзбекистон Республикаси Президенти Ш.М.Мирзиёевнинг ташаббуси билан ҳафтанинг ҳар пайшанба куни мамлакатда «Ҳуқуқбузарликлар профилактикаси куни» деб эълон қилинганлиги муносабати билан Сирдарё вилоят прокуратураси органлари томонидан ҳуқуқбузарликлар профилактикаси ва жиноятчиликка қарши курашиш борасида қатор тадбирлар амалга оширилмоқда. Бунда прокуратура органлари фаолияти очиқлиги ва ошкоралигини таъминлашга алоҳида эътибор қаратилмоқда.

Хусусан, вилоят прокуратураси томонидан вилоят телерадиокомпанияси билан ҳамкорликда «Халқ билан юзма-юз» номли янги телекўрсатув эфирга узатилди.

Ушбу телекўрсатув прокуратура органларининг жисмоний ва юридик шахсларнинг мурожаатларини кўриб чиқиш, тадбиркорлик субъектларининг ҳуқуқ ва қонуний манфаатлари ҳимоясига оид қонунлар ижросини таъминлаш борасидаги фаолияти, қонунчилик ижроси юзасидан ўтказилган текширишлар ва жиноят ишлари тергови натижаларини ёритишга бағишланган.

Бундан ташқари, 2017 йил 29 июль куни Сирдарё вилоят прокуратурасида Коррупцияга қарши курашиш бўйича вилоят идоралараро комиссиясининг навбатдаги йиғилиши бўлиб ўтди.

Йиғилишда Комиссия аъзолари, бошқа идора ва ташкилотлар раҳбарлари, шунингдек оммавий ахборот воситалари вакиллари иштирок этди.

Тадбирда Ўзбекистон Республикаси Президентининг 2017 йил 2 февралдаги “Коррупцияга қарши курашиш тўғрисида”ги Ўзбекистон Республикаси Қонунининг қоидаларини амалга ошириш чора-тадбирлари тўғрисида”ги Қарори билан тасдиқланган 2017-2018 йилларга мўлжалланган коррупцияга қарши курашиш бўйича давлат дастурида белгиланган тадбирлар ижросини таъминлаш борасида амалга оширилган ишлар, йўл қўйилган камчиликлар ва келгусидаги вазифалар муҳокама қилинди.

Йиғилишда, аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш мақсадида прокуратура, адлия, ички ишлар органлари, “Маҳалла” ҳайрия жамоат фонди, “Нуроний” жамғармаси, ҳамда бошқа идора ва ташкилотлар томонидан 20 дан ортиқ учрашув, семинар ва давра суҳбатлари ўтказилиб, телевидение орқали чиқишлар амалга оширилган айтиб ўтилди.

Шу билан бирга, йиғилишда Давлат дастури ижросини таъминлашда йўл қўйилган айрим камчиликлар танқид остига олиниб, тегишли давлат органлари ва ташкилот раҳбарларининг тушунтиришлари эшитилди.

Тадбирда коррупцияга оид ҳуқуқбузарликларнинг олдини олиш, аниқлаш, чек қўйиш, шунингдек коррупция ҳолатларини келтириб чиқараётган сабаб ва шарт-шароитларни бартараф этиш борасидаги чора-тадбирларнинг мутасадди органлар томонидан самарали ва ўз муддатида амалга оширилишига қаратилган аниқ вазифалар белгилаб олинди.

Йиғилиш якунида идоралараро комиссия фаолиятини янада самарали ташкил этишга қаратилган қарорлар қабул қилинди.