Криптовалюталар (виртуал пул) бозорининг жами капиталлашуви 7 август куни савдолар натижасида рекорд кўрсаткичга етиб, 117,7 млрд долларни ташкил этди. Coinmarketcap маълумотлари шундай дейишга асос бўлмоқда. Бу мазкур бозордаги янги энг юқори натижа бўлди. Бундан аввалгиси 12 июнда қайд этилган бўлиб, ўшанда бозор ҳажми 116,9 млрд долларга етган эди. Шу билан бозор бир ҳафтада бирданига 30 фоизга ўсди. 

Бозорнинг кескин ўса бошлаши 5 август куни бошлади. Ўша куни Bitcoin нархи бир неча соат давомида 3200 долларлик чегарадан юқорида турди. Шу билан у ҳам тарихий энг юқори қийматини қайд қилди. 7 августнинг иккинчи ярмида Биткоин бироз муддатга 3400 долларлик чегарадан ҳам кўтарилди. 

Бугунги кунда капиталлашуви бўйича энг йирик криптовалюта айнан Биткоин бўлиб қолмоқда. Унинг бу борадаги кўрсаткичи 55,8 млрд долларни ташкил этмоқда. Унинг ортидан 25,4 млрд долларлик натижа билан эфир (криптовалюта номи) бормоқда. Учинчи ўринни 6,9 млрдлик сармоя билан риппл эгаллаб турибди. Тўртинчи ўринда Bitcoin Cash. Унинг ҳисобида 4,5 млрд доллар бор. 

Умуман, криптовалюталар бозоридаги тебранишлар ўтган ҳафтада кучая бошлади.