Йўловчиларга нисбатан қўпол муомалада бўлаётган ва ўз вазифасини суистеъмол қилаётган темир йўл ходимларига нисбатан кескин чоралар кўрилади. Бу ҳақида 2017 йил 9 август куни бўлиб ўтган Халқаро Пресс-клубнинг навбатдаги сессиясида иштирок этган "Кун" мухбири хабар беради. 

Маълумотларга кўра, 2017 йил бошидан шу кунга қадар Президент виртуал қабулхонасига темир йўл ходимларининг йўловчиларга бўлган муносабати ва поездларнинг санитар-гигиеник ҳолати юзасидан жами 18 мурожаат келиб тушган.  Барча мурожаатлар ўрганиб чиқилган ва айрим йўловчиларнинг ўзлари билан юзма-юз учрашган ҳолда мавжуд муаммолар бартараф этилган. 

"Агарда йўловчилар темир йўл ходимларининг хизмати ва муомаласидан норози бўлишса, чипта олиш жараёнида қандайдир муаммоларга дуч келишса, албатта, тегишли идорага мурожаат қилишлиги мумкин. Биз барча муаммо ва камчиликни ўрганиб чиқиб, ўз вазифасини суистеъмол қилган ходимларга нисбатан қаттиқ чоралар кўрамиз. Фуқароларнинг мурожаати суриштирувлар натижасида ўз тасдиғини топса, касбига лоқайдлик билан қараган ходимларнинг меҳнат шартномаларини бекор қилиш чоралари энг катта жазо сифатида қўлланилади", дея маълум қилди “Ўзбекистон темир йўллари” АЖ вакили. 

Ҳозирги кунда “Ўзбекистон темир йўллари” акциядорлик жамиятида 73 минг нафар юқори малакали инженер-техник ходим ва мутахассислар, йўлсозлар, машинистларни ишчи ва хизматчилар фаолият юритиб келишмоқда.