Россия бош вазири Дмитрий Медведев Россияда ҳайдовчисиз транспорт ҳаракатланиши учун зарур инфратузилма яратишга доир масалаларни ўрганиб чиқиш вазифасини топширди. Бу ҳақида ҳукумат матбуот хизматида маълум қилинди. 

Медведев ҳукумат раиси ўринбосари Аркадий Дворковичга ҳайдовчисиз автомобиллар ҳаракати учун йўл-транспорт инфратузилмаси объектлари рўйхатини тузиш вазифасини топширди. Янги инфратузилма воситалари билан жиҳозлаш ишларини йирик шаҳарлар, шунингдек «Шимол – Жануб» ва «Ғарб – Шарқ» транспорт коридорларида олиб бориш кўзда тутилган. 

Бундан ташқари, Медведев жамоатчилик транспорти ва юк машиналарида йўл ҳаракати хавфсизлигини оширишга йўналтирилган "сунъий интеллект" тизимини қўллаш масаласини ўрганиб чиқиш вазифасини ҳам берди. 

Энергетика вазирлиги, Савдо-саноат вазирлиги ва "Ростехнадзор"га автомобилга ёқилғи қуйиш шохобчалари ҳамда зарядловчи станцияларда жойлашув ва эксплуатацияга доир ягона талаб ўрнатиш бўйича таклифлар ишлаб чиқиш вазифаси топширилди.