Жорий йилнинг 7–8 август кунлари Самарқанд вилоятида вилоятнинг ёш фермер ва тадбикорлари билан очиқ мулоқотлар бўлиб ўтди. Очиқ мулоқотлар Ўзбекистон Ёшлар иттифоқи марказий Кенгаши, вилоят ҳокимлиги, Ўзбекистон Ёшлар иттифоқи Самарқанд вилоят Кенгаши ва ҳамкор ташкилотлар ташаббуси билан ташкил қилинди.

Икки кунлик очиқ мулоқотларда дастлаб ёш фермерлар Самарқанд туманида «Аъзам Азамат Агро» кўп тармоқли фермер хўжалигида ташкил этилган ёш фермерлар учун очиқ мулоқотда Ёшлар иттифоқининг марказий Кенгаши бўлим мудири Бахтиёр Мамадалиев ва Бунёд Ғофуров, шунингдек, вилоятдаги банклар, давлат солиқ қўмитаси, Савдо саноат палатаси, Ягона дарча ва бошқа ҳамкор ташкилотлар вакиллари иштирок этиб ёш фермерларнинг таклиф ва муаммоларини тингладилар.

Очиқ мулоқот давомида ёш фермерлар учун «Аъзам Азамат Агро» кўп тармоқли фермер хўжалигида ҳамда туманда жойлашган «Агромир» ишлаб чиқариш корхонасига саёҳат ташкил этилди.

Очиқ мулоқотнинг иккинчи куни Ургут эркин иқтисодий зонасида ташкил қилинди ва ёш тадбиркорлар учун Ургут эркин иқтисодий зонасига бизнес-саёҳат уюштирилди. Саёҳат давомида ёш тадбикорлар эркин иқтисодий зонада яратилган шарт-шароитлар билан яқиндан танишиб, ўзларини қизиқтирган саволларга жавоб олишди. Шундан сўнг ёш тадбиркорлар очиқ мулоқотда ўз фаолиятларида учраётган айрим муаммолар ҳақида сўз очишди, тадбиркорлик фаолияти учун янги имкониятлар ва таклифлар ҳақида фикрлар билдиришди.

Ўз мухбиримиз.