Ўзбекистон президенти Шавкат Мирзиёев бугунги видеоселекторда Фарғона вилоятидаги вазиятга тўхталди.

«Кун» мухбири хабар беришича, президент вилоят ҳокимини ёшлар муаммолари бартараф этилмаётгани учун танқид қилган.

«Фарғона вилоятида вояга етмаганлар ўртасида жиноятчилик ва ўз жонига қасд қилиш кўрсаткичлари ўсган.

Шунча гап гапирилаяпти, барибир болалар ўзини осяпти. Мажлисда ўтирмасдан шулар билан гаплашилганда эди, осмасди ўзини.

2017 йилнинг ўтган 7 ойида вояга етмаганлар томонидан 129 марта жиноят содир этилган, 24 бола ўз жонига қасд қилган. Вилоятдаги шаҳар ва туманларда вояга етмаганларни яширинча диний ўқитиш ҳолатлари аниқланган.

Биз нима деймизу, бу нима гап?», деган президент.

Президент Халқ таълими вазири Улуғбек Иноятов, Бош вазири ўринбосари, Хотин-қизлар қўмитаси раиси Танзила Норбоева, «Нуроний» жамғармаси раиси Шуҳрат Жалилов ва Фарғона вилояти ҳокими Шуҳрат Ғаниевдан бу ҳолат учун изоҳ сўраган.

«24 киши ўзини осибди. 129 бола жиноят содир этяпти. Ким жавоб беради?

Битта нарсани сўраяпман сизлардан: Ёшлар тарбияси. Автобусда юринглар, уйма-уй юринглар, жар солинглар.

Чарчадингизми, Танзила Камаловна? Чарчаган бўлсангиз, менга айтинг. Чарчаганлар билан ишлашга тоқатим йўқ», деган президент.

Шундан сўнг президент Фарғона ҳокимига юзланади.

«Қани қилган ишларинг? Қани натижа? Эртага кеч бўлади, жаноб Ғаниев.

Яширинча диний ўқитишлар давом этмоқда. Айтган гапларимизни тарғиб қилмадинглар. Бир марта Фарғонада бундай ишлар бўлмайди деб мақола чиқармадинглар.

Қоғозда эканда, юракларингда йўқ эканда ҳозирги сиёсатни қўллаб-қувватлаш, жаноб Ғаниев?..», деган президент.

Шундан сўнг президент вилоят ҳокими ҳақида илиқ фикрлар ҳам билдирган.

«Фарғона вилояти ҳақида танқидий фикрлар билдирдик. Лекин бундай фидоий инсонлар, халқ хизматидаги одамлар кам бўлади.

Бу ўзимизнинг одам. Қўлидан жуда кўп иш келади. Бугунги кунда жуда катта ишлар қилмоқда, бундан хабаримиз бор.

Ҳамма ҳам хато қилади. Хато қилмайдиган одам йўқ. Хато қилган бўлса, бу кечворамиз дегани эмас. Энг ишончли одамларимиздан бири Фарғона вилояти ҳокимидир», деган президент.

Шундан сўнг, президент масъул мутасаддиларга жойларда маънавий муҳитни яхшилаш бўйича чора-тадбирларни амалга ошириш учун 10 кун муҳлат берган.