САВОЛ: Яқин кунларда банк томонидан аҳолига бериладиган 9 фоизлик кредит 14 фоизига айлангани тўғрисида қарор қабул қилинди, деб эшитдим. Шу муносабат билан тумандаги банк филиаллари кредит беришни номаълум муддатга тўхтатган. Бу муддат қачонгача давом этади.?

Жайрона Орифжон қизи Зоирова.

ЖАВОБ: Жорий йилнинг 28 июнидан бошлаб нарх-навога монетар факторларнинг таъсирини камайтириш ва инфляцияни жиловлаш мақсадида Ўзбекистон Республикаси Марказий банки томонидан қайта молиялаш ставкаси 9% дан 14% га кўтарилди.

Марказий банк қайта молиялаш ставкасининг оширилиши тижорат банкларининг кредит ставкалари ва депозитлари фоизининг ўзгаришига таъсир қилади.

Таъкидлаш лозимки, «Банклар ва банк фаолияти тўғрисида»ги Ўзбекистон Республикаси Қонунига мувофиқ банклар банк операцияларини амалга оширишга доир қарорлар қабул қилишда мустақилдирлар ва банк операциялари бўйича фоиз ставкалари ва воситачилик ҳақи миқдори банклар томонидан мустақил белгиланади.

Шунингдек, мазкур Қонуннинг 31-моддасига асосан банклар ва уларнинг мижозлари ўртасидаги муносабатлар шартномалар асосида амалга оширилади.

Шу ўринда, тижорат банклари томонидан кредитлар ажратилиши банкнинг ички кредит сиёсати ҳамда молиявий ҳолатидан келиб чиқиб амалга оширилиши билдирилади

Саволга Ўзбекистон Республикаси Марказий банки юридик бошқармаси бош юрисконсульти С.Отахонов жавоб берди

Эслатма: «Юридик хизмат минбари»да саволларга берилаётган жавоблар тавсиявий характерга эга.