Еврокомиссия раиси Жан-Клод Юнкер ва унга ҳамроҳлик қилган делегациядан 9 киши февраль ойида Брюсселдан Римга хусусий самолётда 27 минг еврога парвоз қилганлар. Бу ҳақда Еврокомиссия маълумотларига иқтибос келтирган ҳолда Sky News телеканали хабар бермоқда.

Маълумотлар очиқлиги учун курашувчи Access Info ҳуқуқни ҳимоя қилиш ташкилоти чоп этган ҳужжатларга кўра, ЕК вакиллари 25-26 февраль куни икки соатлик парвозга 26 минг 351 евро сарфлашган. Римда ЕИ раиси ва унинг жамоаси ўшанда Италия бош вазири лавозимини эгаллаган Маттео Ренци, мамлакат президенти ва парламент спикерлари билан учрашув ўтказган.

Брюссель маълумотларига кўра, бу харажатлар ЕК қоидаларига мувофиқ келган, унга кўра комиссия аъзоларига мос тижорат рейслар бўлмаганда хусусий самолётда парвоз қилишларига рухсат берилади. ЕК расмий вакили ўринбосари Мина Андрееванинг айтишича, бу ҳолатда "раис жадвалига мос келувчи рейслар бўлмаган" ва шу сабабли хусусий самолёт хизматидан фойдаланишга тўғри келинган.

Бироқ телеканал маълумотларига кўра, Брюсселдан Римга ҳар куни 8 та рейс амал оширилади.