Ўзбекистон Президенти Шавкат Мирзиёев “Ўзбекистон Республикаси Ҳисоб палатасининг фаолиятини тубдан такомиллаштириш чора-тадбирлари тўғрисида”ги фармонни имзолади.

Фармонда таъкидланишича, Ўзбекистон Республикаси Ҳисоб палатаси ташқи аудит ва молиявий назоратнинг энг юқори органи ҳисобланади.

Палата ўз ваколатларини мустақил равишда бажаради ва барча давлат идоралари ҳамда ташкилотлари, уларнинг мансабдор шахсларидан эркин бўлади ва ўз фаолиятида бевосита Ўзбекистон Республикаси Президентига бўйсунади, унга, шунингдек, Ўзбекистон Республикаси Олий Мажлиси палаталарига ҳисобот беради.

Ҳисоб палатаси Ўзбекистон Республикаси Президентига тизимли асосда ўз фаолияти, жумладан Ўзбекистон Республикаси Давлат бюджетига тушумлар тўлиқлигини таъминлаш бўйича фаолияти ҳақида маълумот тақдим этади.

Фармонга кўра, палата Ўзбекистон Республикаси Давлат бюджети лойиҳалари параметрларини шакллантириш ва уларнинг ижтимоий-иқтисодий ривожланишнинг устувор жиҳатларига мослигини тизимли таҳлил қилади, қабул қилинаётган давлат ва ҳудудий дастурларни молиялаштириш манбалари аудитини таъминлайди.

Шунингдек, палата бюджет тизими бюджетларига маблағлар ва бюджетдан ташқари бошқа маблағлар тўлиқ тушишини ўрганиб боради ҳамда назорат қилади, замонавий ахборот технологияларини қўллашни кенгайтириш орқали бюджет даромадларини оширишни аниқлайди ва захираларини сафарбар қилади.

Ҳисоб палатаси бюджети тизими бюджетлари ва бюджетдан ташқари бошқа маблағлар ҳисобидан харажатларнинг самарадорлиги ва қонунийлилигини аудитдан ўтказади, уларни барча даражаларда қисқартириш бўйича захираларни аниқлайди в.ҳ.

Ҳисоб палатасига Ўзбекистон Республикаси пул-кредит ва валюта сиёсати, давлат активлари ва мажбуриятлари ҳолати, олтин-валюта захираларини бошқаришни, шунингдек, қимматбаҳо металлар ва қимматбаҳо тошлар билан амалга оширилувчи амалиётларни ташқи аудитдан ўтказиш вазифаси ҳам топширилди.

Ўзбекистон раҳбари Ўзбекистон Республикаси Ҳисоб палатасининг тузилмаси ҳамда штат бирлиги ва Ўзбекистон Республикаси Ҳисоб палатаси тўғрисидаги Низомни тасдиқлади.

Президент Ҳисоб палатасига давлат органлари ва ташкилотларининг юклатилган вазифаларни бажаришда қўлланилувчи  маълумотлар базасига кириш, давлат органлари ва ташкилотларига ўз ваколатлари доирасида уларнинг маълумотлар базасидаги номувофиқликни бартараф этиш бўйича бажариш учун мажбурий бўлган тақдимномани киритиш ва молия, солиқ ҳамда бошқа органлар ходимларини Давлат бюджети даромадлар прогнози тўғрилигини баҳолаш бўйича амалга оширилувчи тадбирларга жалб этиш ҳуқуқини берди.