Google фойдаланувчилари интернетда ядровий зарба вақтида қандай омон қолиш мумкинлиги ҳақидаги маълумотни фаол қидира бошладилар. Google Trends тизими маълумотларига кўра, икки кундан сал кўпроқ вақт ичида “Ядровий зарба вақтида қандай омон қолиш мумкин» иборасининг оммавийлиги динамикаси 0 дан 100 балггача ўсган. 

Шу тариқа, бу ибора анъанавий «Қандай бойиш мумкин” ва “Қандай машҳур бўлиш мумкин” сўровлари кўрсаткичларини бир неча марта ортда қолдирган, деб ёзмоқда Tjournal нашри.

Таъкидлаш жоизки, “Шимолий Корея” мавзуси бўйича ўхшаш сўровлар рўйхатига АҚШнинг Тинч океанидаги ҳудуди бўлган Гуам ороли ҳақидаги сўров ҳам кирган.

8 августда АҚШ разведкаси Шимолий Корея июлда маҳаллий баллистик ракеталарга ўрнатилиши мумкин бўлган ядровий жанговар каллакни яратганини маълум қилган. Шу куннинг ўзидаёқ АҚШ президенти Дональд Трамп Шимолий Кореянинг таҳдидларига “дунё аввал кўрмаган олов ва ғазаб билан” жавоб беришга ваъда берган.

10 августда эса Шимолий Корея ҳарбийлари 18 дақиқа ичида 3,5 минг км лик масофани босиб ўтиб, АҚШнинг Гуам оролидаги ҳарбий базаларига ета оладиган 4 та ракетани учириш режасини тузаётганларини маълум қилдилар. Шундан кейин NBC телеканали Пентагон Шимолий Корея объектларига огоҳлантирувчи зарба беришга тайёрланаётганини хабар қилган.