Бир мансабдор йўлдан адашса, иккинчиси уни тўғри йўлга солиши керак. Лекин мақсади ва маслаги бир бўлганлар эса бир-бирини “тўлдирар” экан. Туроб Амирқулов 2010 йилдан беш йил давомида “Самарқанд халқаро аэропорти” ДУКда моддий-техника таъминоти бўлими бошлиғи лавозимида ишлади. Ўзига яраша обрў-эътибор қозонди. Аммо топганига қаноат қилмай, қинғир усуллар билан бойиш йўлларини излай бошлади, деб ёзади “Ҳуқуқ” газетаси.

Бу вақтда аэропортга икки дона “Гидроамортизатор ГА-200” русумли мосламани сотиб олиш тўғрисида топшириқ бўлди. Топшириқ юзасидан Т.Амирқулов директорнинг туризм бўйича ўринбосари Манучехр, муҳандис Аълам ва бир неча ходимлар билан маслаҳатлашди. Манучехр бу мосламани топишини билдирди. У Хитой давлатига ишбилармон сифатида қатнайдиган Умар исмли танишига учрашиб, масалани тушунтирди. Умар бу турдаги иккита мосламани 7000 АҚШ долларига олиб келиб беришга ваъда берди. Шундан кейин Аълам таниши Шеҳрозга учрашди.

-  Бирон таниш фирмага пул кўчирсак, нақдлаштиришни иложи борми? – деди гапни қисқа қилиб.

-  Ҳал қиламиз, имкони бор, - дея Шеҳроз ҳам масалага ойдинлик киритиб олди.

У орадан бир-икки кун ўтиб, “Samarqand Savdo Invest Plyus” МЧЖнинг тўлдирилмаган, лекин бир томонига муҳр ва имзо қўйилган шартномасини Аъламга бериб кетди.

Хуллас, бу шартноманинг керакли бандлари тўлдирилиб, “Самарқанд халқаро аэропорти” ДУК билан шартнома тузилди ва унинг ҳисоб рақамига икки дона “Гидроамортизатор ГА-200” русумли мосламани сотиб олиш учун дея 198 млн. 656 минг сўм пул кўчирилди.

Келишувга кўра, МЧЖ раҳбар ушбу сумманинг 83 фоизини нақдлаштириб берди. Аэропорт учарлари бу пулнинг бир қисмига қора бозордан 7000 АҚШ доллари сотиб олиб, Умарга беришди. Умар ҳам Хитойдан мосламани олиб келиб, ваъдасини бажарди. Қолган пуллар эса гуруҳ аъзоларининг “моддий таъминоти учун” ўзаро бўлинди.

Бундан ташқари, бу “олғирлар” “Самарқанд халқаро аэропорти” ДУК билан “Sagdiana Maroqand Omad” МЧЖ ўртасида тузилган асосий воситалар етказиб бериш тўғрисидаги шартномадан ҳам “улуш”ларини олишган экан. Мазкур шартномага асосан 2014 йил 1 январидан 2016 йил 1 июнига қадар МЧЖ ҳисоб рақамига 629 млн. 412 минг сўм маблағ кўчириб берилади. Гуруҳ аъзолари бу пулнинг 75 фоизига асосий воситалар ва товарлар олиб, қолган маблағни, яъни 157 млн. 353 минг сўмни муайян фоизлар эвазига нақдлаштириб олишганлиги исботланди.

Бухгалтерияга топширилган ҳужжатлар, ҳисоб-фактуралар, имзоларнинг барчаси сохта бўлиб чиқди.

Текширишда ушбу ҳолатларга ойдинлик киритилиб, тергов давомида барча ўмарилган пуллар тўлиқ қайтарилди. Лекин, қонун ўз сўзини айтди. Суд ҳукми билан юқоридаги шахсларга тегишли жазо тайинланди.