АҚШ президенти Дональд Трамп 200 кундан кўпроқ вақтдан бери президент лавозимини эгаллаб келмоқда. NBC телеканали ҳисоб-китобига кўра, у бу муддатдан 50 кунни Оқ уйда эмас, балки ўзига тегишли гольф-клубларда ўтказган.

Трамп Trump Organization оилавий компаниясига тегишли масканларда ҳаммаси бўлиб 65 кун ўтказган.

Агар бевосита гольф ўйини ҳақида гапириладиган бўлса, Трамп камида 21 марта қўлида гольф клюшкаси билан пайқалган. Таққослаш учун, аввалги президент Барак Обама президентлигининг илк 6 ойида 11 марта гольф ўйнаган.

Телеканалнинг таъкидлашича, Трамп сайловолди кампанияси вақтида Обамани у ўзига жуда кўп ҳордиқ чиқаришга ижозат бериши учун бир неча маротаба танқид қилганди. “Мен сизлар учун ишлайман. Менда гольф ўйнашга вақт бўлмайди”, деб айтганди ўшанда Трамп.