АҚШ президенти Дональд Трамп Венесуэла раҳбари Николас Мадуро билан суҳбатлашишдан бош тортди. Бу ҳақда Оқ уй матбуот хизмати хабар берган.

Хабар қилинишича, Мадуро 11 август куни Оқ уйдан Трамп билан телефон мулоқоти ўтказиш ҳақида сўраган.

Шу билан бирга, Америка президенти маъмуриятининг таъкидлашича, Трамп Каракасни конституция ва инсон ҳуқуқларини ҳурмат қилишга, шунингдек, ўз халқига жабр-зулм ўтказишни тўхтатишга чақирган. Бироқ Венесуэла ҳукумати Америка томонига қулоқ солмади, дея қўшимча қилади Оқ уй.

«АҚШ Венесуэла халқини қўллаб-қувватлайди. Президент Трамп мамлакатда демократия тикланганидан сўнг Мадуро билан суҳбатлашади», - дейилади Оқ уй хабарида.

Аввалроқ Мадуро АҚШ билан муносабатларни тиклашга тайёрлигини маълум қилганди.