Америкалик актёр Леонардо Ди Каприо италиялик рассом Леонардо да Винчи ҳақидаги фильмда бош ролни ўйнайди. Суратга олиш ишлари қачон бошланиши ҳозирча номаълум.

Фильмга америкалик журналист ва Time нашрининг собиқ муҳаррири Уолтер Айзексон китоби асос қилиб олинади. Бу китоб октябрда АҚШда сотувга чиқарилади. Аввалроқ Айзексон Apple компаниясининг марҳум раҳбари Стив Жобс ҳақида бестселлер ёзганди. Бу китоб асосида Дэнни Бойл режиссёрлигида, актёрлар Майкл Фассбендер ва Кейт Уинслет иштирокида фильм суратга олинган.

ОАВнинг маълум қилишича, машҳур рассом ҳақидаги фильмни суратга олиш ҳуқуқини Paramount Pictures сотиб олган. Ди Каприо фильм продюсерларидан бири бўлади. Variety нашри маълумотларига кўра, актёр бу роли учун “етти рақамли гонорар” олади. 

Ди Каприонинг таъкидлашича, у буюк рассом ва ихтирочининг ролини ўйнашни жуда истаган, чунки унинг номи онаси томондан айнан да Винчи шарафига Леонардо деб қўйилган.