Машҳур америкалик актёр Том Круз Лондонда “Бажариб бўлмас топшириқ” фильмининг 6-қисми суратга олиниши вақтида трюк ижро этаётганда жароҳат олди. Бу ҳақда TMZ портали хабар бермоқда.

Суратга олиш вақтида кўпинча трюкларни ўзи ижро этадиган 55 ёшли актёр билан ушбу воқеа 13 августда юз берди. Портал эҳтиёт мосламасига эга Круз эпизодлардан бири суратга олиниши вақтида бир томдан иккинчисига сакрамоқчи бўлганда, мўлжални ололмай қарама-қарши бино деворига анчагина куч билан урилгани акс этган видеони намойиш қилган. Актёр деворга урилгандан кейин томга кўтарилиб, эҳтиёт мосламаси камарлари ёрдамида ортга сакраган. Шундан кейин уни суратга олиш гуруҳи вакиллари олиб кетишган. Актёр қанчалик жиддий жароҳат олгани айтилмаган.

“Бажариб бўлмас топшириқ” фильмининг илк қисми Брайан Де Пальма томондан суратга олинган ва экранларга 1996 йил чиққан. Фильм янги қисмининг экранларга чиқиши 2018 йил июлга режалаштирилган. 

Шуниси маълумки, янги фильмнинг сюжети махфий агент Итан Хант воқеасининг давомига асосланган. Хант ролини барча қисмлар давомида Круз ижро этиб келади. 

ОАВ маълумотларига кўра, актёрнинг аввалги фильмлари учун олган гонорарлари тушумдан олинган фоиз билан бирга 70 млн доллардан кўпроқни ташкил қилган.