Ямайкалик спринтер, афсонавий Усейн Болт Лондонда ўтаётган енгил атлетика бўйича жаҳон чемпионатида фаолиятидаги охирги спринти вақтида жароҳат олди. Бу ҳақда Синьхуа хабар берди.

Воқеа 4х100 метрга эстафета баҳсининг финалида юз берди.

Болт эстафетанинг якунловчи босқичида югуриши керак эди. У шеригидан эстафета таёқчасини олиши билан оқсоқланиб, рақибларидан сезиларли масофага ортда қолишни бошлади ва сўнгра умуман тўхтаб, югуриш йўлкасига қулаб тушди

Шу сабабли Ямайка терма жамоаси эстафетани якунлай олмади.

Эстафетани эса жаҳон чемпионати мезбони Буюк Британия ютди. 2-ўринни АҚШ, 3-ўринни эса Япония эгаллади.

2007 йилдан бери жаҳон чемпионатлари ва Олимпия ўйинларида бирорта эстафетани ютқазмаган Болт сўнгги эстафета финалини юта олмади. У билан бирга 8 та Олимпия олтин медали, жаҳон чемпионатларидаги ғалабалари ва жаҳон рекордлари қолди. 

Болт ҳар доим шоуни яхши кўрган. Бу гал ҳам у ўзи истамаган ҳолда охирги спринтини юракни эзувчи ва драматик шоуга айлантирди.

Болт ҳақиқатан ҳам ажойиб атлет. У бутун дунёда телевизорлар 10 йил давомида 100 ва 200 метрга югуриш вақтида айнан у учун ёқиладиган инсон бўлиб келди. Миллионлаб одамларнинг нигоҳлари унинг табассуми, старт олдидан хурмача қилиқларига, дистанциядаги кенг қадамларига, унинг охирги метрларидаги ўзини рақибларига нисбатан гоҳида масхараомуз тутишига қаратилган эди. Болтдан бўлак ким ҳам юз метрга югуришда маррагача 10 метр қолганда орқасига аланг-жаланг қилганча ғалабани нишонлай олади? Оқибат натижада барча ундан яқин келажакда забт этилмайдиган жаҳон рекордлари ва унинг машҳур имо-ишорасини кутиб қоларди.