Шимолий Корея етакчиси Ким Чен Ин мамлакатнинг ракета қўшинлари раҳбарияти билан учрашиб, АҚШнинг ҳарбий базасига ракета зарбаси бериш борасида кутиб туришга тайёрлигини айтган. 

Ҳарбийлар суҳбат чоғида Шимолий Корея компартияси томонидан тегишли буйруқ олиниши билан АҚШнинг Гуам ороли томон зарба беришга тайёр эканликларини айтганлар. Ким Чен Ин ҳарбийларни мақтаб, “америкалик империалистлар ўз хатти-ҳаракатлари билан ўз бўйинларини сиртмоққа тиққанларини” айтган. Унинг айтишича, у АҚШ барчасини тарозига солиб, яхшилаб ўйлаб кўриб, ўзининг “даҳшатли тақдирини” енгиллаштирувчи қарорга келгунча кутиб туришга тайёр.   

Ким Чен Иннинг таъкидлашича, америкаликлар «Шимолий Кореяга нисбатан иғволарни тўхтатишлари ва келажакда бундай уринишлардан воз кечишлари зарурлигини тан олишлари керак”.

Унинг айтишича, АҚШ Шимолий Кореянинг сабрини синамоқда. Ким Чен Иннинг таъкидлашича, америкаликлар оқилона фикр қилишлари керак. У, шунингдек, ракетачилар партиянинг буйруғини доимо бажаришлари кераклигини ва зарурат бўлганда “янкилар нафасини бўғишлари” зарурлигини таъкидлаб ўтди.  

Аввалроқ Пентагон раҳбари Жеймс Мэттис АҚШ томонга ҳар қандай ракетанинг учирилиши уруш бошланишини англатишини айтганди. Унинг айтишича, америкаликлар «Шимолий Кореянинг бундай ҳаракатларига тезда жавоб қайтарадилар».