Президент қарорига мувофиқ Тошкент вилояти, Чирчиқ шаҳрида янгидан ташкил этилган Чирчиқ давлат педагогика институтида жорий йил 20та таълим йўналиши бўйича 750 нафар талаба қабул қилиниши белгиланган эди. Бу ҳақда Kun.uz'га хабар берган Халқ таълими вазирлиги Ахборот хизмати талабаликка қуйидаги тавсифга мос келадиган абитуриентлар қабул қилинишини билдирган:
«Таълим муассасаларига ўқишга қабул қилиш бўйича Давлат комиссияси 2017/2018 ўқув йили учун Тошкент вилояти Чирчиқ давлат педагогика институтининг талабалари контингентини Тошкент вилоятида доимий яшаётган, ушбу вилоят туманларидаги таълим муассасалари эҳтиёжларини инобатга олган ҳолда Тошкент давлат педагогика университети ва бошқа турдош олий таълим муассасаларига ҳужжат топшириб, мазкур таълим муассасаларига белгиланган тўлов-контракт квоталари доирасида ўқишга қабул қилинмаган мос ва турдош таълим йўналишлари абитуриентлари ҳисобидан шакллантиради».
Соддароқ қилиб айтсак, Тошкент вилоятида «прописка»сига эга, шу йил педагогик таълим йўналишида ўқиш истагини билдириб, ОТМлардан бирига ҳужжат топширган, аммо талаба бўлиш насиб этмаган ёшлар учун яна имконият бор. Доимий яшаш жойидаги педагогик ходимларга бўлган талабга қараб, кириш натижаларида энг юқори рейтингда кира олмаган абитуриентлар бу имкониятдан фойдаланиши мумкин.
Чирчиқ давлат педагогика институтига абитуриентлар имтиҳонсиз, тўлов-контракти асосида талабаликка қабул қилинади.
