Жорий йилнинг февраль ойида 80 ёшини нишонлаган Норвегия қироли Харальд V елканли спорт бўйича жаҳон чемпионатида 8 метрлик R-синфидаги (8mR) яхталар пойгасида иштирок этмоқда. Қиролга тегишли “Сира” пойга яхтаси ва унинг шпикерининг ёши улуғлигига қарамасдан, улар ёш иштирокчилар ва замонавий яхталар учун анча хавфли рақиблар ҳисобланади.

Қирол ўнта регатдан 3 таси натижасига кўра мусобақанинг 28 иштирокчиси орасида 6-ўринни эгалламоқда. Жорий йилда 20 августгача давом этадиган чемпионат Норвегиянинг  Ханкё ороли яқинида ўтмоқда. Бу оролда эса қироллик оиласининг қароргоҳларидан бири жойлашган. Эътиборлиси, 1983 йилги жаҳон чемпионати Харальда V’нинг отаси қирол Улаф V’нинг 80 йиллигига бағишланган эди. Қирол Улаф V бу мусобақаларда “Сира” бортида регатларда иштирок этганди.

Ушбу яхта 1938 йилда норвегиялик муҳандис Юхан Анкер томондан ўшанда ҳали валиаҳд шаҳзода бўлган Улаф учун махсус қурилган. Бу яхта ва унинг нусхалари ҳанузгача энг мукаммал 8 метрлик яхталардан ҳисобланади.

Харальд V отаси каби ўсмирлигиданоқ ашаддий яхтачига айланган. У бир неча маротаба нуфузли халқаро мусобақаларда иштирок этган, 1987 йилда эса ўз экипажи билан бир тонналик яхталар тоифасида жаҳон чемпионатини ютган. Қирол тахтни эгаллашидан олдин Норвегия терма жамоаси таркибида учта – 1964, 1968 ва 1972 йилги Олимпиадаларда иштирок этган. Унинг учун Мюнхен Олимпиадаси анча муваффақиятли кечган. Бу ўйинларда унинг экипажи 5,5 метрлик R-синфдаги пойгаларда 8-ўринни эгаллаган.

Қиролнинг отаси Улафнинг Олимпиададаги фаолияти анча муваффақиятли бўлган. Улаф 1928 йилги Олимпиадада 6 метрлик яхталар тоифасида Олимпия чемпиони бўлган.