Сайёр Пресс-клубнинг Бухорода «Авлиёлар юрти Бухоро: замонавий туризм, иқтисодий-ижтимоий ривожланиш, истиқболли лойиҳаларга макон» мавзусида бўлиб ўтган навбатдаги сессиясида Бухоро вилояти ҳокими Ўктам Барноев Бухоро шаҳридаги ободончилик ва пахта мавсумидаги мажбурий меҳнат масалаларига тўхталди.

Шаҳардаги Моҳи Хоса маҳалласидаги йўлларнинг носозлиги ва бу хорижлик сайёҳларнинг ҳам келиб кетишига ноқулайликлар яратаётгани ҳақидаги саволга жавоб берар экан, Ў.Барноев шундай деди:

— Биз бу маҳаллани шаҳарнинг янги ҳокими Карим Камолов билан бориб кўрдик, вазиятни ўргандик. 1 ой ичида ҳудуд тўлиқ ободлантирилади. 

Умуман, фурсатдан фойдаланиб, жавобга қўшимча тарзда ободонлаштириш ва қурилиш ишларига жуда катта ҳажмдаги инвестициялар ётқизилаётгани қайд этиб ўтишим керак. Илгари Бухорога тадбиркорлар келишга қўрқишган. Ўзим ҳам кўп йиллар республика миёқсидаги корхоналарда меҳнат қилиб, Бухорога бировга билдирмасдан, секин келиб, секин чиқиб кетар эдим. Ҳозир вазият ўзгарган. Бугун Бухоронинг дарвозаси, ишлайман, обод қиламан деган ҳар қандай тадбиркор учун очиқ. Агар улар дарвозадан сиғмаса, деворни бузиб киритамиз Бухорога, — деди вилоят ҳокими Ў.Барноев.

Бухоро вилоятида ишлаб чиқариш соҳасига инвестиция ётқизган ёш тадбиркорлардан бирига сўз берилди:

— Айни пайтда Бухоро шаҳрида ва Бухоро туманидаги Галаосиё шаҳарчасида логистика маркази (вилоят ҳокими ушбу марказ 15 миллион доллар эвазига бунёд этилаётганини айтиб ўтди), иссиқхоналар барпо этиш ва у учун учун анжомлар, плёнка ишлаб чиқариш заводини, пестицидлар ишлаб чиқарадиган корхонани қурмоқдамиз. Вилоят ҳокимлигининг қўллови ёдамида бу ишларга умумий ҳисобда 35 миллион АҚШ доллари миқдорида инвестиция ётқизилмоқда, — деди тадбиркор.

Пресс-клуб модераторининг вилоятда пахта йиғим терим мавсумида ўқитувчилар ва бошқа бюджет соҳаси ходимларининг мажбурий меҳнатидан фойдаланиш масаласи бўйича берган саволига Ў.Барнов шундай деди:

— Аввало, пахта терими ҳеч ким учун мажбурий эмас. Бу йил деҳқонларимиз ажойиб меҳнат қилишган. Ҳосилни йиғишда қатнашиш ихтиёрий бўлади. Терган пахтасига пулни ўша куниёқ оладиган қиламиз. Бухоронинг барча жойида ана шу тартиб жорий этилади.