Surxondaryo hokimi: Odamlarni majburlab paxtaga olib chiqish - noinsoflik!

«Surxondaryo: Boy meros, turizm va islohotlar uyg‘unligi» mavzusida Surxondaryoda bo‘lib o‘tgan Xalqaro press klubning sayyor sessiyasida Surxondaryo viloyat hokimi Erkinjon Turdimov moderator Sherzodxon Qudratxo‘jayevning paxta yig‘im terimiga byudjyet tashkilot xodimlarining jalb qilinishi borasidagi savollariga javob qaytardi.

— Men viloyat rahbarligiga kelgan kunimoq, ushbu masalani ko‘targanmiz. O‘qituvchi va shifokorlarning dala ishlariga, ko‘chada qator bo‘lib obodonchilik ishlari bilan shug‘ullanishiga to‘liq barham beramiz.

O‘zingiz o‘ylab ko‘ring, majburlab, mehnatiga pul to‘lanmasdan dalaga olib chiqilgan o‘qituvchi yo shifokor chopiq va boshqa dala ishlarini vijdonan bajaradimi? Qarg‘ab-qarg‘ab ishlamaydimi? Bu axir paxta hosiliga ham ta'sirini o‘tkazmasdan qolmaydi-ku?

Ikkinchidan, bu yil paxtaning xarid narxi sezilarli tarzda oshirildi, terimchilarga paxta yig‘im-terimi uchun to‘lanadigan pul ham oshmoqda. Surxondaryoda yollanma ishchi kuchi juda arzon — kuniga 20–25 ming so‘mga ishlashadi. Paxta uchun 400 so‘mdan pul to‘lanishini hisobga olsak, 100 kilogram paxta teradigan inson kamida kuniga 40 ming va undan ham ko‘proq pul ishlab topishi mumkin. Fermerlar ana shunday kishilarni yollab, pulini to‘lab, o‘zlari yig‘ib-terib olishadi paxtani kerak bo‘lsa. O‘qituvchilarni dalaga chiqaradigan bo‘lsak, fermerlar dangasa bo‘lib qoladi.

Mana, ilgari maktab o‘quvchilarigacha paxtaga chiqarilardi. Barham berildi. Keyin kollej o‘quvchilari chiqarilardi, bunga ham barham berildi. Paxta terilmasdan qolib ketayotgani yo‘q-da.

Takrorlab aytaman: Surxondaryoda na o‘qituvchi, na shifokor paxta yig‘im-terimiga jalb qilinmaydi. Birovga yaxshi ko‘rinish, rejani bajarish uchun boshqalarni majburlab paxtaga olib chiqish — noinsoflik! — dedi viloyat hokimi Erkinjon Turdimov.