KUN.UZ таҳририяти томонидан Қашқадарё вилоятининг Шаҳрисабз шаҳри, “Кунчиқар” маҳалласи, Чоштепа қишлоғида истиқомат қилувчи 22 яшар Жаҳонгир Ибрагимовнинг даволаниши юзасидан хайрия акцияси уюштирилган эди.

Орадан деярли бир ой вақт ўтиб, биз Ибрагимовлар хонадони билан яна боғландик. Маълум бўлишича, мақола эълон қилинган куни, яъни 22 июлда Жаҳонгир билан Халқ депутатлари Фарғона вилояти Кенгаши депутати ЎзЛиДеП аъзоси Йўлдашев Мўминжон Шокиржонович боғланган ва протезлардан бирини ўз маблағи ҳисобидан олиб беришини айтган. Ўша куни Жаҳонгир отаси Усмон ака билан пойтахтга йўл олган. Депутат томонидан беморнинг протези учун 3000 АҚШ доллари, дори-дармонлар учун 5 млн. сўм ва ота ва боланинг меҳмонхонада истиқомат қилиш харажатлари қопланган. Жаҳонгир шифокорлар кўригидан ўтказилгач, 25 июль куни Тошкент тиббиёт академиясида операция қилинган.

Айни кунларда у Шаҳрисабзда. Аҳволи яхши. Шифокорларнинг маълум қилишича, 7 ойдан сўнг унинг иккинчи оёғида ҳудди шундай жарроҳлик амалиёти ўтказилади. Унгача у шифокорлар кўригидан ҳар икки ойда ўтиб туриши лозим.

Шу кунга қадар Жаҳонгирнинг номига очилган ҳисоб рақамига 7 млн. 145 минг сўм, пластик картага эса 14 млн. сўмдан зиёд маблағ келиб тушган. Шифохона харажатлари ва даволаниш учун мазкур маблағлардан фойдаланилмоқда. Йигитнинг ўзи ва оила аъзолари мазкур ишда моддий ва маънавий ёрдам кўрсатган барча-барчадан чин юракдан миннатдор ва ҳақларида дуода. Хайрли ишни сўнгига етказиш улкан савоб, деганларидек Жаҳонгирнинг иккинчи оёғида жарроҳлик амалиёти ўтказиш учун бироз маблағ етишмай турган экан. Моддий томондан имконияти борлар унга ёрдам беришса, мақсадга мувофиқ бўлар, бошланган хайрли тадбир чиройли якун топган бўларди.

Жаҳонгир Ибрагимовнинг қўшимча маълумотлари:

Пластик картадан пул ўтказмалари учун Жаҳонгирнинг дадаси Жўраев Усмон Ибрагимович номига очилган пластик карта рақамлари: 8600 0423 0789 6539
Банк ҳисоб рақами: 20206000999981281001
Мурожаат учун Жаҳонгирнинг телефон рақами: +998903149000